ماني بناسى من لها القلب نابض=من حبها والروح تحيا بنبضه
في داخلي من جائر الشوق قابض=الفكر حاير يحكمٍ(ن)فيه قبضه
ماهو بشوقٍ(ن)ياهل الود عارض=محتل كل القلب طوله بعرضه
من وقت وأنا أحس بالقلب خاضض=كل ما هدأ نبضه بلا الشوق خضه
حكم الهوى ماله من الناس ناقض=حكم علي بحكم ياصعب نقضه
حط السهد فوق المخدات رابض=حرم علي النوم ماذقت غمضه
يلعب بضغطي بين عالي وخافض=والحب يعلا عاجز العقل خفضه
طيف الغلا برقٍ(ن)على الفكر نايض=لامن برق قلبي على الوجد حضه
غرامها في داخل القلب ناهض=ينهش بقلبي والطواريق جضه
كني على الرمضا مصابٍ(ن)بماضض=موجوع كل العمر ماهو ببعضه
من حب من حبه على الروح فارض=مكتوب لي والعبد مايكب فرضه
مديون له بالحب والزين قارض=بنك الهوى عجزت تسديد قرضه
أهب ياحبٍ(ن)يشيب عوارض=لو هو محول فوق شامخ يقضه
حبٍ(ن)نقي واضح ولاهو بغامض=خلي سما بالحب والشوق بأرضه
أنبت لنا من كل حالي وحامض=ياحلو نبت الحب صبره وحمضه
دين الهوى ما يعترف بالنواقض=مهما تزايد داخل القلب نفضه
قلبي ورى المحبوب ملهوف راكض=مرتاح به مهما تمادى بركضه
يجمح سواة اللي بلا عنان كاضض=ساقه جنون الحب عيا يكضه
عل وعسى ياتي من الزين عايض=كل هم خالج للمشاعر يفضه
يسقي عروق القلب ويفيض فايض=يروي به إحساسٍ(ن)عنا البعد عضه
دام الهوى يانفس مابه تعارض=صبرك على قسوة حبيبك وغضه
مابيننا يانفس مابه تناقض=تفداه روحي وأقبل بما يعرضه
ماني بناسى من لها القلب نابض=من حبها والروح تحيا بنبضه

صحت أبدانكم جميعا


لا خلا ولا عدم


تقدير للجميع

المشاركة الأصلية كتبت بواسطة البدوي (المشاركة 150220) صح لسانك واعتلا شانك ابداع معهود

المشاركة الأصلية كتبت بواسطة ذياب بن غانم (المشاركة 150227) رائعة من روائعك صح لسانك

المشاركة الأصلية كتبت بواسطة الرقيب (المشاركة 150272) صح لسانك للرضا ابداع غير مستغرب تقبل التحية

المشاركة الأصلية كتبت بواسطة سلطان البقمي (المشاركة 150273) صح لسانك. قصيده طيبه. تقديري واحترامي..