ودي اسمي من ذبحني غيابه=
لكن اعرف اهل الحكا مايخلون=
حتي السلام اللي يشرف جنابه=
شحيت به عشان نسلم وينسون=
شفته قبل يومين يكتب كتابه =
ياحيّ مايكتب وياحيّ هاللون=
خلاني انسا من عطاني شبابه=
اثر الهوي مثل الشياطين ملعون=
ذكره مايسلم من مقص الرقابه=
لو اذكره يخفون شمسي من الكون=
ياهل النضا ماعاد فيها طلابه=
خلوني اذبح له من الضين تكفون=
حب الشرف مافيه ذم وعيابه=
وانا من اهل الدين والناس يدرون=
حرام ينشدني واكنّ الاجابه=
تقول واليني من الانس فرعون=
الحب له عندي مقام ومهابه=
والله مافرط فيه| تثنون تشنون=
حتي نبي الله وجمع الصحابه =
ماقالو اللي في جنابي تقولون=

ياسعيد خابر فيك عزم وصلابه=واليوم أشوفك تعرك الرمش والنون
تالي زمانك جاك طيش وصبابه=وشلون هذا الوضع وشلون وشلون
ماهو غريب غراب يعشق غرابه=اللي غريب الناس لونه يحبون
ياسعيد خلك ذيب مثل الذيابه=لا تروح فيها بين ميسا وميسون
الذيب لا من واق ريعٍ(ن)عوا به=واللي بهم مسٍ(ن)من الجن يعوون
يامرافقٍ(ن)للجن نار الحرابه=ما تحرق الا ناس للنار ياطون
راسك بعد لفيت فوقه عصابه=سج الركايب وانطح العال والدون
لا تشتكي ياسعيد ضيم وكأبه=ترى النشاما باللقا ما ينخون
وأهل الخيابه حظهم بالخيابه=ما كل ماهو يرتجونه ينالون
والله ما يطولون قد الذبابه=يبطون ياذيبان يبطون يبطون
الديك يذن لو عليه الجنابه=قاله بديوي قبل ما أكون وتكون