طال السفر والبُعد زاد المسافه=العمر يركض والمواجع تلاحقه
واللي رحل ما عاد يرجع خلافه=يا هاجسي إرتاح ما أنته بسابقه
ما عاد ينفع بالمواجع حسافه=القلب وقتي بالملمات حارقه
عدة سنين أون وأشكي خلافه=الهم جاثم بالصدر ما يفارقه
حتى غدا عودي مثل للنحافه=من جرحي اللي بالشرايين سارقه
عقب غيابك يا حسين اللطافه=كن الصدر على المعاليق طابقه
اعوي عوى سرحان من جوع حافه=كني صويبٍ(ن)طاعنه رمح عالقه
من شدة الطعنة نسي فرح شافه=ماله أمل إلا ينجيه خالقه
عن واقعي هربت صوب الخرافه=أتبع سحاب بليل ما لاح بارقه
يمطر على قلبي بليا ريافه=من وجد روحي والمشاعر تعانقه
أسهر وخلي مهتني في لحافه=ما لاعه اللي لاعني من زوارقه
لو حس مثلي بالخفوق إرتجافه=تسابقت يمي ركايب صوادقه
ما كان طيفه ضيف صاحب كلافه=كل ما غشاني ليل شن لبيارقه
ساحر وكاهن مدعي للعرافه=بانت على حالي دلائل خوارقه
يلعب بروحي لعب متقن حرافه=لا من هدى نبضي غزى القلب طارقه
عقب لفكري والرزانة صلافه=الشوق يكبر والبُعد حيل خانقه
يحضن لحلم الليل والصبح عافه=لن صار وهم الفكر شمس لمشارقه
أصرف لحلمي صرف مسرف صرافه=يطمع بمكسب والخساير تصافقه
يا وقت شعري شاب طاروق قافه=كاد القصيد وحيرتني طوارقه
القلب ينزف ما يعاوز لأضافه=غيبة حبيبة يازمن حبل شانقه
طال السفر والبُعد زاد المسافه=العمر يركض والمواجع تلاحقه