لا غاب عني صاحبي غض الانهاد=قفلت من دون القصائد مية باب
الشعر في غيره نواقص ولو زاد=لو هو جميل بدون ملهمه ينعاب
أهون علي أسهر وأعاني للإسهاد=من قاف أقوله في نواعيس كذاب
وليا حضر لو كان من غير ميعاد=غنيت له طاروق طيب للأطياب
لا فاح عطره بالمحل طب الأكباد=تراقصت مشاعري والسمر طاب
كل الليال بجيته عندي أعياد=يا فرحتي لا شفت عنقه والأتراب
وإنهل مجدولٍ(ن)على كتف وأعضاد=رابيه ما قصه على موضة أجناب
أدعج غنج ما داخله لوم وأحقاد=صاف الجبين وبسمته تأسر الباب
عوده غصين البان يهتز مياد=والساق زانته الخلاخل والأكعاب
العين عين الريم لامح لصياد=لا من كسره يتوب لقلب ما تاب
لكن حسافة غاب عني ولا عاد=حده زمانه والبعايد والأقراب
كثر التمني ما نفعنا ولا فاد=لا فادنا ساحر ولا قاري اكتاب
صرنا من اللوعة مثل نحل أعواد=وشلون عاد نزود الهم بعتاب
ليت الزمان الزين يرجع وينعاد=نرجع كما كنا قريبين وأحباب
أنظم قصيدي فيه والفكر ينقاد=وأرجع أنا وإياك يا شعري أصحاب