قلبي عظيم الشوق والحب هده=للفاتن اللي بحبها صرت مأسور
الصاحب اللي شرقة البدر خده=سلمته الخفاق والبال مسرور
إعجاب مدري حب مدري موده=ما كنت أظن الحب شعلة بدافور
من يومها والقلب ما فيه شده=أشعر بدم القلب غلاي ويفور
الضغط عالي والصبر قل رفده=عجز يداويني معالج ودكتور
دواي عند اللي فؤادي يوده=أنخاه يفزع لي مجمل ومشكور
الحق علي الشوق واصل لحده=هد المشاعر قبل لا موت محرور
قرب وهد الشوق يا خي هده=داو الجروح وعالج لقلب مكسور
قلبٍ(ن)ذبحه الشوق حره وبرده=الجرح ينزف مير ماهو بمنظور
هواك بيت الروح مني يجده=جد الحبال بشلف من كف مقهور
منهو يودك يا أريش العين بده=تراك بالتقصير ما أنته بمعذور
عجل دواك العمر مافيه مده=تنقذ وليفك وأنت بالفعل مأجور
عقب الزمن صبري من البعد كده=غديت مثل اللي بسكين منحور
عجزت دمع العين بالكف ارده=لا من ذكرتك يا بعد نبض وشعور
تسابقت عبرات عيني بلده=صوب المكان اللي به الولف مذكور
طال الغياب وما مضى ويش بعده=الى متى وأنا على الصبر مجبور
الوقت بحساب الدقايق نعده=اربع سنين وفوقها سبعة شهور
ما ذقت حلو النوم فوق المخده=اسهر من المغرب ليا طلعة النور
أثر الهوى ملعون لا بعث جده=من طاح به يشكي ملاعات وثبور
يهزم لجهد الرجل ويبيح سده=ويصير له بعد العلا عبد مأمور
قلبي عظيم الشوق والحب هده=للفاتن اللي بحبها صرت مأسور