يابنت ياللي ذوقها فوق الأذواق...=طيب وكرم وأعذب كلام ومشاعر...
معك السوالف تشرح الصدر لن ضاق...=يا ملهمة معنى القصائد لشاعر...
أسامر أطيافك ليا وقت الأشراق...=أقرب لفكري من جميع الخواطر...
أنثر لك ورود الشعر فوق الأوراق...=لين إشتكت مني حروف ودفاتر...
سويت لك من عالم النبض هيشتاق...=ينقل لك إحساسي بليا تذاكر...
يرسم مشاعرنا بلا زيف ونفاق...=ليل الهوى ما بان له صبح باكر...
نسهر مع الأحلام في ضم وعناق...=لين السهر يبس عيون ومحاجر...
طعم السهر يشبه مشاريب وأطباق...=مرٍ(ن)مرار ومر مثل السكاكر...
الليل للعشاق ما يعرف إرفاق...=يا ما قضيت الليل للصيح ساهر...
عجز يداوي علتي بالسهر راق...=واحتار بالتشخيص كل الدكاتر...
دام الكلام العذب للقلب سراق...=بحلم بشوفك والسهر جبر خاطر...
كل ما كسر ظلام الأشواق براق...=أشوف خدك فيه والعطر ماطر...
يمطر على قلبٍ(ن)مولع بالأعماق...=مكسور ماله يا أريش العين جابر...
يطرد بحلمه ما بعد يالغضي فاق...=من سكرته بالحب ما عاد فاكر...
إن المسافة بيننا بحور وأفاق...=يا بعدها تقطع لحيل المسافر...
وأنا أدري إن البعد من بيننا عاق...=جيتك وإلا شوفتك بالنواظر...
مهما تشب بداخلي نار الأشواق...=وإلا تجز القلب جز الخناجر...
يبقى الهوى يا بنت بالقلب دفاق...=قلبي يعاني من جروح ومخاطر...
هذا قدرنا منكتب مثل الأرزاق...=من بادي الأعمار حتى نغادر...
لو هو بكيفي خذت للعمر ما لاق...=ما كان ذقت الشوق مثل المجامر..
ولا كان قلبي خلف الأحلام منساق...=حلمه وهمه للمشاعر تشاطر...
وأنا أشهد إن البعد والشوق حراق...=بُعد المسافة للمحبين قاهر...
ينشف لدم قلوبنا قبل الأرياق...=اللي تبل حلوقنا والحناجر...
حملٍ(ن)ثقيل وصبر ما عاد ينطاق...=الى متى بكون للصبر قادر...
الصبر طعمه مر ماهو بينذاق...=والله يعين اللي على المر صابر...
يابنت ياللي ذوقها فوق الأذواق...=طيب وكرم وأعذب كلام ومشاعر...