تكفين ياكل الغلا لا تشحين=لامن طلبتك بالعطا بادريني
قلبي يسابقني ليا قلت تكفين=قلب الهوى مقسوم بينك وبيني
نبي نعيش لحبنا كالسلاطين=أمرك وأنتي بالهوى تأمريني
اليا طلبتك لا تقولين بعدين=يا كود ناوية ن بها تبعديني
لا تجلين لمطلبي تو ذا لحين=بعد العنا يا منيتي ريحيني
افرح بمدة منك ياكامل الزين=بأقل ميسور الهوى تسعديني
وليا عطيتي يا غلا لا تمنين=ترى التمنن يوجع الطيبيني
واخذي مطاليبك من الخشم والعين=يرخص لك الغالي ولو كان عيني
الحب لامنه جمع بين قلبين=الله على نزف المشاعر يعيني
نمسي ونصبح للمواجيع شاكين=من واهجِ(ن)بين الحنايا دفيني
سببه جرح الشوق والبعد والبين=وأفكار مجنونة تغيب وتجيني
قلبٍ(ن)يحب وعقل ما يعرف اللين=القلب يأمرني وعقل يعصيني
ودي أزور صويحبي وأقضي الدين=مير الظروف الثانيات تحديني
خوفي من العذال ومخالف الدين=تأمر وتنهى بالحشا يا ظنيني
مرت سنين وباقيٍ(ن)يمكن سنين=بين الرجا واليأس ضاعت سنيني
قضيتها متقلبٍ(ن)بين نارين=قلبي وعقلي فوقها تشتويني
إن جئت أجازف قيّد الحظ قدين=قيدٍ(ن)عليّ وقيد يمنع خديني
ما حيلتي إلا قصيد المحبين=أنشر عليه أشواقنا والحنيني
ما دام يا دنيا القسا ما تحنين=يكفيني أعرف قلب خلي يبيني
الزين يبقى زين ما يلحقه شين=والشين عمره ما رجع يوم زيني
أنا حبيبي حاتمي بالكريمين=مده يسابق بالعطايا يديني
ماهو كما الدنيا مثل حد سكين=ما يعرف الرحمة ولا فيه ليني
تكفين ياكل الغلا لا تشحين=لامن طلبتك بالعطا بادريني