صاحبي تالي أيامه ظروفه شنيعه=ما يرد لجواب ولا يسال لسوالي
وإن تكرم عليًه في رسالة سريعه=بيتطمن على حبه بقلبي وبالـي
قلت حبك سيامي للحشا والربيعه=ما تعود لفصل سيام فوق الخيالي
مير طول المسافة بيننا يا رفيعه=متعبتني و وصـلك قل تال الليالي
عشمتني بوصلٍ(ن)ما يعقبه قطيعه=وإبتدت بالقطيعة قبل تبدأ وصالي
فعل جاير يخالف عرفنا والشريعه=مير هذا زمانٍ(ن)ما يعرف المحالي
العوايد تلاشى في حضور البديعه=وصلي أنا غريب وهجر خلي مثالي
الفضا ضاق في عيني والأرض الوسيعة=ما ترك صاحبي للوصل داني مجالي
سكر أبواب كانت للتلاقي مطيعه=حسبي الله عليه وعزتي فوق حالي
كن قلبي بصدري وسط شوك النقيعه=من ظروف الحبيب وحظ ماهو بحالي
صاحبي تالي أيامه ظروفه شنيعه=ما يرد لجواب ولا يسال لسوالي