يا قلبي اصبر وربك ما يخيب اللي ترجاه=لا بد من بعد عسر اليسر هذا حال الأيام
لا تشتكي غير لله عالمٍ(ن)باللي تمناه=شكوى لغيره مذلة يفرح بشكواك لـوام
الخلق كلٍ(ن)بحاله منشغل باله بشكواه=ما احدٍ(ن)بينفعك لو تشكي على خيلان وأعمام
ما تكسب إلا ملامة عاذلك شكواك تهناه=شكوى رفيع الأصل تعلا بها قامات الأقزام
يا قلب صبرك على همك جسارة لين تنساه=وإن كان لا بد تكشف ما تعاني كون ضرغام
دور لمن هو ليا منك كشفت الجرح داواه=هون عليك المصيبة ما تجاوز دين الإسلام
هذا رفيق السعد عونك على وقتك وبلواه=ياقف بوجه الشدايد ما تهزه طول الأعوام
ما يندرق عن لزوم اللي تعنوى له ومن جاه=ستر الرفيق الموالي عون منهو جاه منضام
ماهو مدور ورا ما يبذله سمعة ولا جاه=عادي مع الناس وأفعاله تعادل فعل حكام
عسى صدوف الزمن تاطأ معاديه وتعداه=هذاك تعجز بمدحه نادرات الشعر وأقلام
يا قلبي اصبر وربك ما يخيب اللي ترجاه=لا بد من بعد عسر اليسر هذا حال الأيام