يا قصيدي ارفع الرايعة بعد ذقت الهزيمه=انكسر وزن القصيد وضاعت لحون القوافي
بعد غاب اللي مسوي للشعر معنى وقيمه=الشعر كله على بعضه من الضيقه بعـافي
القصيد بدون غاية ما يضوي من غنيمه=مثل ميت ما يحس بحس حيٍ(ن)بالعوافي
السنين الحاضرة ما تشبه سنينٍ(ن)قديمه=باهتة مثل القوافي والبلا بالجوف خافي
المشاعر شبه موتى بالقلوب اللي سقيمه=الزمن جاير وهجر أحبابنا بالسطح طافي
كل ما قلنا يزين الحال والنية سليمه=جابت الدنيا ظروفٍ(ن)عكرت ما كان صافي
الليالي قست قلوبٍ(ن)قبل كانت رحيمه=كن ما سوى الزمن في حالنا ماهو بكافي
ما بقى بالقلب جهد ولا بقى فينا عزيمه=كل يوم يمر كن أقدامنا ترجع خلافي
راح حلو أيامنا ما باقيٍ(ن)غير الدميمه=ما تسترها ثياب ولا يغطيها لحافي
جيش شعري منكسر عقب النصر ذاق الهزيمه=وانكسر وزن القصيد وضاعت لحون القوافي