عامين قلبي كن يصلاه صالي=الدم يغلي في عروق الشـرايين
مشتاق لك يا فاتنة بالجمالي=يا من تساوي بالعذارى ملايين
اذكرك بين الناس والا لحالي=واذكرك وسط الفرض بين المصلين
واذكرك لن لعب النصر والهلالي=ابغا الهلال يفوز لأجل تفوزين
اشجع لناديك ماني مبالي=من شان عينك تكرم النفس والعين
يا مكسبي بالعمر يا راس مالي=يا وردتي بالحب من شهور وسنين
منزلك وسط القلب بلحيل عالي=عجزوا عليه ينافسوك المزايين
ما ياخذ الغالي يقع شخص غالي=وانتي خذيتي كل ماهو تريدين
خذيتي احساسي وقلبي وحالي=وتركتي اشواقي ولهف المحبين
اسرح بها واسهر بها فالليالي=واحلم بعد طول المغيبة تردين
والحمد لله بعد طال اعتلالي==جيتي تداوي للمواجع وتشفين
حل الفرح والهم والضيق زالي==يا مرحبا يا ست الأحباب واهلين
بستقبلك بالورد وارقص والالي=وافرش على دربك زهور ورياحين
بنظم قصيدي فيك من كل حالي=تستاهلين من القصايد دواوين
وأنا يكفيني حنان ودلالي=والضحكة الحلوة بذيك الشفاتين
من مبسك يا بعد كلي ومالي=يا جنة الدنيا عليًه تمونين
يفداك كلي يا غرام الليالي=يا ساكنة بالقلب بين البطينين
دمي وعلمي والشعر والمقالي=سخرتها لأجلك من أول وذا لحين
العمر كله فدوتك يا حلالي=واللي مضى عامين وأنتي تخبرين
عامين قلبي كن يصلاه صالي=الدم يغلي في عروق الشرايين