يا وجد حالي يا هلي يا وجودي=على الذي شفته قليل الحلايا
برقع خليجي فوق ريمٍ(ن)سعودي=أيقظ براكين الهوى في حشايا
شفته عصر يجمح مذير عنودي=من شوفته خذيت والله بلايـا
حرك مشاعر كامنة بالسدودي=عجزت أخبيها وأخبي هوايا
ريمٍ(ن)تعدى زينها للحدودي=ما ظن مثله بالحلا فالصبايا
الورد كاسي وجنته بالخدودي=يسحر جماله للبشر والمرايا
الصدر زامي مفتخر بالنهودي=عجزت تغطيها وساع العبايا
ريان عود ليا تمايل بعودي=سوى بقلبي والمشاعر سوايا
الريح ورد ومسك عنبر وعودي=من هف ريحه بان فيني خفايا
وقفت له وقفة ملك للجنودي=في صفة الطابور يعطي تحايا
ما كن حاديني ظروف وقيودي=ولا كن من دونه سباعٍ(ن)طوايا
لبيت يا لبيه يا بعد فودي=أمر تراني من رجالٍ(ن)طنايا
والله لبذل لأجل عينك جهودي=وأرخص لعينك غاليات العطايا
لأجلك يهون الصعب ويقل زودي=يا مالكٍ(ن)للي حمته الحنايا
أعطاك ميثاق الوفا والعهودي=وباقي عليها لين وقت المنايا
ماني لحبك يا غرامي جحودي=مهما تعبت من الهوى هو دوايا
دامك حبيبي ما حسبت لحسودي=العود في عينه صباح ومسايا
وسلام مني كل ما هب نودي=عليك مني يا حسين النوايا
يا وجد حالي يا غلا ياوجودي=عليك يا نادر وصوف وحلايا