طير الهوى ينقر الهاجوس واحرمني منامي=أسهر معه من غروب الشمس حتى تشرق الشمس
أسهر مع أطياف مضنوني وأصدق للحلامي=اللي تمني لروحي بالهنا والحاصل العكس
يا ويل حالي من أشواق المحبة والغرامي=لا من ذكرت الوليف اللي عيونه خادرة خرس
والخد يلمع كما البارق ليا زاح اللثامي=ونيت ونة سجينٍ(ن)كاتفينه ظلم بالحبس
يا حلم عمري غدى حالي ولا نلت المرامي=ودي و ودك لكن ظروفنا ما ترحم الحـس
أيام وسنين راحت كم بقي بالعمر عامي=ما صار ماهو نريده والهوى يحمس بنا حمس
أشكي عليك المواجع وأسمعك تشكي هيامي=نحلم تزين الظروف وكل يوم يمرنا أخس
ونقول ياليت وقتٍ(ن)فات يرجع بالسلامي=لا صار يومٍ(ن)نعيشه مختلف ماهو كما الأمس
أكيد بنحن للماضي حلاله والحرامي=لكن يانفس صبرك والرجاء في خالق النفس
يمكن تزين الظروف وينقشع ليل الظلامي=نبدأ ليالي هنية بعد أخذنا بالشقا درس
وأرتاح من طير ينقر هاجسي طيًر منامي=أنام مرتاح من وقت الغروب لشرقة الشمس