لن ضاق صدر حبيبي ضاق صدري=وليا فرح مدعوج الأعيان غنيت
غنيت مجرور وهجيني وحدري=وتبعت في دنيا الهوى ما تمنيـت
أنظم قصيدي فيه ويزين شعري=لا من تهيض خاطري فيه سجيت
ملهم هجوسي بالهوى والي أمري=يأمر وينهاني ليا رحت وإن جيت
القاه معنى عشق في حرف نثري=والقاه لهفة شوق في داخل البيت
أغازله ما بين شطرٍ(ن)وشطري=طول النهار وحلم ليلي ليا أمسيت
كل ليلةٍ(ن)حلمي مع الطيف يسري=كل ما أتمنى لأمنية قال ياليت
وليا طلبني حاجته ماش عذري=جهزت مطلوبه عجل ما توانيت
وليا طلبته حاجتي قال بدري=اصبر وأنا من زايد الصبر مليت
الى متى بصبر على البعد مدري=ضاع العمر ما نلت ماهو تمنيت
راحت سنين وتالي العمر يجري=واللي كسبته من زماني فتافيت
ما جاء زماني حسب ما راد فكري=يا قل ما أخذته ويا كثر ما أعطيت
ما نلت من حلم العمر لو عشري=اللي بغيته كان ياكيت من كيت
واللي خذيته ما يزود لصبري=ومن يوم شفت الحظ مقفي فقفيت
الخاتمة يارب ترفع لقدري=في كل وقت ادعيك وإن قمت صليت
رفعت لك شكواي من كل عسري=وأثنيت لك بالحمد في كل ما أسديت
يارب ياعالم بجهري وسري=اسألك عفوك كان ياربي أخطيت
رحمتك بالدنيا ورحمة بقبري=لا صرت بين يديك ياخالقي ميت
يارب وسع ضيق قبري وصدري=يامزبن المحتاج من فضلك أغنيت