ليت حظي يجيب اللي تمناه عيني=شوفته تبهج الخاطر وتعدل مزاجه
غائبٍ(ن)عن عيوني حال دونه سنيني=ما تهنيت في شوفه وضحكة حجاجه
الزمن والمسافه بين خلي وبيني=عقبت بالمشاعر والخفوق ارتجاجه
أتمنى لقربه مير ربي يعيني=المقادير سوت بالطريق انعواجـه
ما بقى غير حرقة بالحشا من حنيني=اتوجع كما اللي مبتلع له زجاجه
كل ما مرني طيفه تزايد ونيني=يرعد القلب من جرحٍ(ن)صعيبٍ(ن)علاجه
يا عشيري زماني بالبعد مبتليني=كل ما قلت تقرب حال دونك عجاجه
آه من حظي اللي يطعن القلب فيني=والصبر والتمني ما قضت أي حاجه
أتجرع مرار الصبر مالي معيني=اشرب الشوق لكن ما يروي هماجه
كيف بروى بدونك وأنت وينك و ويني؟=الحوادي مكيدة والمشاعر مهاجه
راح عمري وعمرك ما تبي تحتريني=ويش اسوي بعشقٍ(ن)حايرٍ(ن)في خراجه
حظي أقسى من الصوان عيا يليني=والليالي تعينه ما تبا لإنفراجه
هب يا حظي اللي بالنكد مغتزيني=بيني وبين مضنوني مطفي سراجه
ليت حظي يجيبك لين تبصرك عيني=شوفتك تبهج الخاطر وتعدل مزاجه