يا بهجت غرامي يا بعد كل من حبيت=غرامك بروحي منغرس ما يفارقني
سنينٍ(ن)طويلة كم تشوقت واتمنيت=أشوفك وطيفك كل ليلة يلاحقني
وجاد الزمن والحظ جابك بعد عانيت=تكرمت لي بالوصل والشوق حارقني
بليلة لقا ما مثلها بالزمان أمسيت=ياليت الهنا باقي زماني يصـادقني
على الموعد اللي بيننا يا غرامي جيت=أسوق المشاعر والمشاعر تسابقني
على شأن أشوفك جئت بالضبط فالتوقيت=عسى شوفتك عند التلاقي تروقني
هلا بطلتك يا بدر عمري ليا طليت=جميع المشاعر بالتلاقي تعانقني
مشاعر غرام وشوق ما منها مليت=يا نبض الفؤاد اللي بحبك معلقني
هلا يا نسيم العطر من وردةٍ(ن)شميت=هلا يا هوى من عدة أعوام رافقني
فديت العيون وبسمةٍ(ن)مثلها ما أريت=وفديت لتفاصيلك وكلك يا سارقني
سرقت الفؤاد بحسنك الساحر وصكيت=على قلبي بسجن الهوى يا معلقني
تعلقت في حبك رغم كل ما لاقيت=من البعد والحرمان كانك مصدقني
سهرت الليالي لأجل عينك سهيري ليت=ياليت الغلا بالوصل ليلة تذوقني
تفضلت لي بلقاك يا فاتن لشيخ ثبيت=عسى الله يديمك عشق ما دام عاشقني
على الروح تأمر وإن طلبت العمر لبيت=عسى الله بكل اللي تمنى يوفقني
عطيتك عهد للحب وأقول كان أوحيت=حبال الهوى بيديك حاذر تطلقني
أنا مستحيل أوفيك حقك ومهما أعطيت=قليل بغلاك اللي بروحي موثقني
يا بهجت غرامي يا بعد كل من حبيت=غرامك بروحي منغرس ما يفارقني