ياللي غيابك طال كيف التدابير=ما هي بعادة تقطع الوصل يازين
طول الجفا والصد ياخل ما يصير=وش غيرك يا كامل الذوق واللين
كنت أتصبح بك وأمسيك بالخير=وأتلى العهد بمواصلك قبل شهرين
نشدت عنك الناس والجن والطير=مافيه حيٍ(ن)قال شافك ولا وين
وكتبت فيك الشعر رجز ومجارير=بلغ قصيدي فيك عدة دواوين
ياما تلمست لك بالصد تبرير=وياما على طيفك تذكرت لسـنين
ياما تلمست لك مني معاذير=وياما شكيت الود والبعد والبين
وشلون بقوى الصبر من دون تصبير=لا صرت مدري عنك يا قرة العين
بعدك هموم القلب جوفه طوابير=أشد من هم المطاليب والدين
تنتابني لوعات بين التفاكير=أخاف ما أنت بخير وأنغم بالحين
ليتك تطمني عن الحال ما غير=أخير من حيرة سواة السكاكين
مستوطنة بالقلب مثل المناشير=ترعى خلايا الود جوف الشرايين
وإن كان ما تقدر ودونك محاذير=عز الله إن الحال من بعدك يشين
بدق في نعش الأمل للمسامير=وأستخلف الله في غرام المحبين
ياللي غيابك طال كيف التدابير=ما هي بعادة تقطع الوصل يازين