افنيت عمري في بحور القوافي=نادمتها واودعتها سر شكواي
رافقتها في جو عاكر وصافي=بين الرجا والياس تابعت ممشاي
ماقلت ياشعري تعنيت كافي=ماني بعارف وين ياشعر مرسـاي
أمشي على جمر المواجيع حافي=أحمل على الأكتاف همي ونجواي
اركض امام وعين فكري خلافي=احن للماضي وخايف من الجاي
أخذت من عهد الرخاء والعجافي=ما كل ما لاقيت وافق لمشهاي
شيء جميل وشيء منها يعافي=حصاد عمري يشبه لوجه دنياي
يومٍ(ن)بشوش ويوم كالح وهافي=تقلب الأيام من هاي للباي
كل ما إستقام الدرب جاه إنحرافي=ما يستقيم الحال ما وافق مناي
أتعب لقلبٍ(ن)خلف عوجٍ(ن)نحافي=النابض اللي خازن لكل بلواي
مكسور من جور الزمان الخرافي=اللي معنيني بصبحي و ممساي
ما عدت أنا ذاك الشجيع السنافي=ولا عادت أفعالي تماشي لدعواي
ما كني اللي كنت صلب متعافي=لكن على رب المخاليق مشكاي
ما بين كان وصار فيه إختلافي=ما دايم إلا محيي الخلق بالماي
اللي يعلم السر لو كان خافي=يعلم بمكنون الضماير ورجواي
ما غيره الرحمن للحال شافي=قادر يحقق لي مطاليب لدواي
افنيت عمري في بحور القوافي=نادمتها واودعتها سر شكواي