عسى برق السحاب اللي على قطر الرياض ينوض=يسقيها ويسقي روضةٍ(ن) ربت عنود الصيد
تنعم في فيافيها وأنا من بعدها مغيوض=سنين طوال فيني جرح ينزف والمكان بعيد
منايه قربها لكن من دون المهاه عضوض=حوادي لو سلمناها نعيد قبل يوم العيد
لكن الله كتب واللي كتب ماعاد فيه نقوض=أمر ربي نفذ واللي يريده غير ما بنريد
وأنا أدري فيك يا ريم الفلا ما عادني محظوظ=مسافات الفيافي والزمن فيها العنيد يهيد
عرفت الواقع المؤلم يناقض حلمي المفروض=أقول سعيد وأنا من بعادك ما غديت سعيد
أمل عمري بنيته حلم وردي يا غزال الروض=وراح الحلم مع هب الرياح مشردٍ(ن)تشريد
وش اللي عاد باقي دام حبل وصالنا مرضوض=نريد مفيد واللي نفعله ما صار وصل يفيد
فؤادي من حوادي وقتنا يا شاردة مخضوض=وحظك مثل حظي يا مهاة الريم فوقه قيد
بغيت أعلن وأقول أقصد فلانة وإسمها معروض=على شاشات فكري والقصايد بالغرام تشيد
لكني خفت من عاذل وحاسد والحسد مرفوض=يا سر العشق في قلبي وسر البوح والتغريد
أغرد بالقصايد والصدر من غيبتك مقبوض=عنود الغيد أنا من بعد ما غبتي هجرت الغيد
ما باقي غير شعرٍ(ن)فيك ياسر الهوى مقروض=نظمته فيك يا نبع القصيد الشاهد المشهود
عسى برق السحاب اللي على قطر الرياض ينوض=يسقيها ويسقي روضةٍ(ن) ربت عنود الصيد