يا مرسل اللوم حاسب لا تعدى الحدود=أيامنا و الليالي بالصفا ما تدوم
الجو وشبه تعكر يا سليل الفهود=وأنته رفيق القروم ومن كرامٍ(ن)قروم
ما جئتك أكشف سدود ولا مبيح سدود=جئتك مدور معزة ليش فيها تلوم
وإن كان عايف هوانا ياعريب الجدود=خلاص بعنا المودة في حراج الرخوم
ما عاد لي بالمودة والمحبة فيود=قضيت منها ولا لي من وراها لزوم
لا صار مقدارنا مفروض فوقه قيود=يكفيني الستر من ربي وستر الهدوم
برحل من الدار وأسكن في فجاج النفود=اللي نقيٍ(ن)هواها ما يسد الخشوم
مالي ومال التحضر والغدر والجحود=اللي ملأ للقلوب وللمشاعر سموم
جو الصحاري نظيف ولو فيها جمود=يا زين برد الصحاري عقب لفح السموم
أطيب من الرفقة اللي تاليتها نقود=أرتاح من شك ناسٍ(ن)ما تعرف السلوم
حتى على نية الإنسان يبغوا شهود=ما يعلم النيًة إلا من رفع للنجوم
يا مرسل اللوم حاسب لا تعدى الحدود=أيامنا و الليالي بالصفا ما تدوم