جتني تسوق المشاعر صبح مهديه=ببداية العام جتني في نهار الربوع
قالت صباح الهنا وأحلام ورديه=قلت:ارحبي يا هلا ترحيب من كل نوع
قالت:صباح القصايد قلت:بيديه=كتبت فيك القصايد يا حسين الطبوع
يا شبه ريمٍ(ن)تربت بأرض نجديه=حركتي الشعر بالشاعر سواة الفزوع
قامت تزاحم قصايد منك محديه=على هجوسي سواة مزاحمات الجموع
تمايلي يا قصايد مع شقرديه=هزي للاجي تراقص خلف عوج الضلوع
ما دامها يا قصيدي جات جديه=اشرب زلال المعاني من شفاه الفروع
اللي كما القطن لون ونعم برديه=في مثلها يا قصيدي لا تظلي قنوع
هذي بعمر الزمن تجيك فرديه=ما مثلها يا قصيدي في جميع الربوع
الدم دم العرب بأوصاف هندية=ما كنها غير همسة تحت ضوء الشموع
بالدم والروح والإحساس مفديه=ياليتها بس تصبح مرةٍ(ن)بالسبوع
جتني تسوق المشاعر صبح مهديه=ببداية العام جتني في نهار الربوع