الهاجس اللي سرى بي ما سرى بي خطأ=لقي على القلب فرصة واستغل الفرص
القلب مشغول باللي حبها قد سطا=سطا على العقل لين القلب هام و رقص
يالهاجس اللي تبيني بالقصيد أنشطا=أنا نشاطي وليفٍ(ن)للبشر ما ينص
يا مكرمتني بنار الشوق زود العطا=بأجيالنا القادمة يُروى علينا قصص
وين العهود القديمة ليش هذا البطا=ما ترحم لحالي اللي بإنتظارك نقص
مرت سنين وسنين الدرب ماهو وطا=وأنا سجين المودة والمعاهد قفص
تقول بجيك مسرع يا بطي الخطا=واتعبت عيني تراقب دربك المنعقص
مشيتك ما كنها إلا مشي طير القطا=وأنا حنيني من الأشواق جاء مرتقص
عقد الهوى يا حبيب الروح لا تفرطا=توك عليًه تراني بالبطا منخمص
توك عليًه حبيبي بالعلاج إقلطا=اقلط على جرح قلبي عالجه واحترص
لا تذبح الحلم فيني ذبحة المشرطا=واللي تقطع عروقه لو بري ماخلص
ارجع كما عهدك الماضي ولا تشرطا=ترى شروط المحبة ماحقة للحصص
ارجع ورجع محبك لا تشيل الغطا=ترى المشاعر يجيها مثل داي البرص
اللي يصيبة ما يلقى للعلاج وسطا=يموت من حر مابه ما شفي منقرص
والله والله ماودي بشيء أغلطا=لكن صبري تجاوز للحدود و بقص
لكن بالقلب حرقة للفكر تخلطا=تقص نادر هجوسي مثل قص المقص
يا ماشط الصدر بالونات لا تمشطا=وأنا حشاية لسري والمشاعر قلص
ماني مبيح كنيني فوق كل ارقطا=ولاني برامي لغالي في يدين القنص
الهاجس اللي سرى بي ما سرى بي خطأ=لقي على القلب فرصة واستغل الفرص