ياعذب الروح ياللي قص حبك للمشاعر قص=
ترى ذكرى لقانا صعب نسياني يمررها=
تذكرت المكان اللي جمعنا قبل عام ونص=
وهز الصدر ونة ودي لوقتي يكررها=
وأنا مدري لويش الله يخصك بالمحبة خص=
مقادير الله اللي فوق خلق الله مقدرها=
غديت بعالمك خاتم بليا فص مدري فص=
على كف الهوى روحي على شأنك مبعثرها=
غرامك يابعد كل العرب في زود مابه نقص=
تهاويل الهوى عجزت أحللها وأفسرها=
أشوف لطيفك الساري أمام العين يرقص رقص=
وأحس بجمرة ٍ(ن)جوف الحشا شوقي مجمرها=
مشاعر عشقي المجنوني داخل خافقي تنرص=
لكن البعد والأيام وظروفي تعكرها=
متى مدري متى تضحك لي الدنيا بليا نغص=
وأشوفك والظروف الشاينة شوفك يدمرها=
أبيك تقول لي متى ياباخص للمحبة بخص=
وأبيك تحدد الميعاد والمولى ميسرها=
ياعشقي في زماني ماش غيرك بالهوى مختص=
ترى روحي غرامك يابعد روحي معمرها=
لكن الحظ والأيام تقرص للمحبة قرص=
حلوم العشق لن ضاعت صعيب انا ندورها=
تدبر في مصير أحلامنا قدام يلحق بقص=
ترى الأعمار تركض والهوى عيا يحررها=
ياعذب الروح ياللي قص حبك للمشاعر قص=
ترى ذكرى لقانا صعب نسياني يمررها=