هبت هبوب الشعر مابين لجين=ماجت بحوره كلهن بخيالي
والشعر دارت بوصلته إتجاهين=قطب(ن)جنوبي وقطب(ن)شمالي
والموقف الّي فيه للشعر قطبين=يصعب على الوصاف وصف الرجالي
وإحتارت الأفكار مابين الأثنين=والغالي الّي بين الأثنين غالي
والعقد ينظم والجواهر مزايين=كل ما تقادم عقد جاله بدالي
والعاصمة محظوظةٍ بالمربين=كم طافها من شيخ بأول وتالي
والليله الليلة بها النور نورين=نور طلع والنور الأخر يلالي
عبدالعزيز أعطيت لسنين وسنين=والعمر باقي والعبر بالتوالى
والله يثبتكم على الحق والدين=رمز تميزت ابه يابن الحلالي
ماحدت عن مبداك رغم الموالين=غصب عن الحساد واهل الضلالي
في حفظ مولاكم وحنا موالين=محبة(ن)لله مالك ومالي
ورغم الوداع العين ما تترك العين=الجم صافي عذب طعمه زلالي
ويامرحبا ترحيب أهلا وسهلين=بالشيخ عبدالله حميد الخصالي
إبن هويمل حر منبعه حرين=تلمح جوابه قبل طرح السؤالي
رمز الأشارة يفهمه من فطينين=والحمل ما يثبت ليا كان مالي
طير بلا جنحان صيد الضعيفين=وبيت بلاعمدان ماله ظلالي
ومن داس بالأقدام روس الثعابين=غدا طعام للرخم والثعالي
والله يعينه قولوا آمين وآمين=أمانة التعليم مثل الجبالي
وحنا معه صف على العسر واللين=حتى يحقق عاليات المعالي
في ظل أبو فيصل ربيع المساكين=نور الدجى في مظلمات الليالي
الّي زرعها لين صارت بساتين=وأمسى بها المهموم للهم سالي
والمعذرة لن كان بالقول تلحين=هذا بعض شيء بفكري طرأ لي
وختامها صلوا عداد المصلين=على شفيع الخلق بعد الزوالي

المشاركة الأصلية كتبت بواسطة عساف الأصائل (المشاركة 24948) صح لسانك وبيض الله وجهك ما قصرت لك تقديري

المشاركة الأصلية كتبت بواسطة binhlailبن هليــل (المشاركة 24962) صح لسانك وعلا شأنك رائعة من روائعك لا هنت لك تقديري

المشاركة الأصلية كتبت بواسطة نجم العرب (المشاركة 24969) صح لسانك وعلا شانك قصيدة جزلة يعطيك الف عافية لك تقديري

المشاركة الأصلية كتبت بواسطة كامل الأوصاف (المشاركة 24978) صح لسانك قصيدة رااااائعة لك كل التقدير