القوافل العربية - قالت ترى منت بحلو قلت رجال

القوافل العربية (https://www.alqwafel.com/vb/index.php)

- قوافل الشعر الشعبي (النبطي) (https://www.alqwafel.com/vb/forumdisplay.php?f=15)

- - قالت ترى منت بحلو قلت رجال (https://www.alqwafel.com/vb/showthread.php?t=4483)

قالت ترى منت بحلو قلت رجال

قالت ترى منت بحلو قلت رجـال
والزين ماهو من شروط الرجولـه

الزين يلقى عنـد لباسـة الشـال
والرجل زين ان كان زانت فعولـه

قالت علامك تلبس شماغ وعقاال
انت بدوي؟ قلت بدوي ومن حموله

ما ألبس بناطيل لها الوان واشكال
وامتر الشـارع بعرضـه وطولـه

قالت اجل راعـي معاميـل ودلال
شرب القهاوي تحسبونـه بطولـه

كيفي يابنت الحضر دله وفنجـال
وحليب خلفـه بالمـراح معقولـه

وحب الكرم والجود وعلوم الابطال
مغروس فينا من زمـان الطفولـه

قالت ترى بنت البدو حظها مـال
قلت احذري حذرا تكونـي جهولـه

بنت البدو يابنت مضرب للامثـال
فوق الجمال وطاعـة الله خجولـه

ماحطة اصباغ ولا حطـت ظـلال
ولا سيرة بالسوق سيـر مهبولـه

هي مهرة تصعب على كل خيـال
وانتي ومثلك عسفهـن بالسهولـه

قالت تغزل بي وشف حبة الخـال
ناظر عيوني والرمـوش الكسولـه

قلت العفو مايجتمع حـب وهبـال
ولكـل ذوق فالمزايـيـن جـولـه

قلتي وقلت وكلمة الصدق تنقـال
الزين ماهو من شـروط الرجولـه

الشاعر غير معروووووف