الحق واضح كنه الضوء مشبوب=في ليلة ظلما وكل(ن)يضيحه
لاصار وجه العلم مهو بمقلوب=مشروح في كل اللغات الفصيحه
أخير لك طلاب لاتكون مطلوب=قدام لا تفصل عليك الشريحه
ومن لاركب بالأوله صار مركوب=وجه الرجل لا يكون مثل السطيحه
ومن لا يعرف العلم مهو بمرغوب=صفة ببعض الخلق والله قبيحة
إن كان ودك خير لاتفعل ذنوب=جنب عن المتردية والنطيحة
ترى العماية بعضها جوف الأقلوب=بعض الصدور تضيق مهي فسيحة
أحد(ن)يتوب من الخطا واحد ما يتوب=وأهل العقول الثاقبة مستريحه
وترى الدهن لاقرب النار بيذوب=أقل شيء من الحرارة يسيحه
ولا كل ضرع(ن)يافتى صار محلوب=حتى ولو غرك بكثرة نضيحه