يابن عميش العلم ياشيخ ينصاك=عطني علومك كلها بالتفاصيل
أفرح ليا مني تعلمت شرواك=والعلم ما يعقله غار الرياجيل
وش صار في زرع زرعناه وإياك=عسى الزراعة جالها من محاصيل
وإن كان راحت يبيض الوجه تفداك=الخير مقبل بالليال المقابيل

هلا بالحجازي عد ما هل همال=على البن الأشقر والعلوم الجزالي
وأنا بنشده من وين هو جاينا طال=من الشرق والا جاينا من شمالي
يقولون بالامثال للضيف فنجال=وأبي رد علمك يا كريم السبالي
ويبقى ثنين تكيف الراس لا مال=خفيفة ثقيلة مثل حمل الجمالي
ولا يالحجازي قل لنا رد الأمثال=تعرفونها والا عليكم ثقالي
وأنا ظن بالي إن بالثوب رجال=يعرف العلوم الأولة والتوالي

وصلني جوابك والمواقيف بأفعال=وبيت تجيه الشمس ماله ظلالي
ليا كنت راعي كيف محماس ودلال=تراهم ثلاثة من عيال الدلالي
أنا قلت لك واحد وباقي بعده عيال=من البن الأشقر ياشجيع العيالي
ترى الكيل يحتاج له رجال كيال=وكيف بلا معبار ماهو بحالي
جمال البدو ياذيب تحتاج جمال=يقود الجمال ويشتري كل غالي
تعلم ورد العلم من غير مرسال=ترى العلم واضح ما يعاوز جدالي

يامرحبا يا شاعر شن غاره=مدري رصيده كم بالبنك مليون
توه مطلع نمرة وإستماره=بالهون خل المشي بالدرب بالهون
صل الصلاه وحج وأخذ زياره=وارفع يدينك قول يالله بالعون
ترا العلوم أشكال حلو ومراره=وأنته تعرف العلم والناس يدرون
واللي يصيبه بالمواقف حراره=يضيع رايه بين صاحي ومجنون
وبيت المعزه والنقا والطهاره=يبقا رفيع الشان والناس يدنون
والعج لا شفته مثور غباره=لاتنطحه بالراس لو عندك قرون
درب السلامة ما يعاوز شطاره=ترا طريق العافيه دوم مزيون