لك وحشـة سهلة على قلب ولسـان=إلــي تقوليهـا ولغيــري تقوليـن
لكــن مهمـا صـار أو كـان ما كـان=أكيــد فــرق بينهـا لـو تحســــين
ليا كانت اللهفـة على صدق وإيمان=تخرج من أقصى القلب للي تودين
وليا كانت الكلمـة مجامـل لعـلان=تخـرج عفـو وأنتِ لهـا مـا تلـــدين
سمعتهـا منكِ و قالتــه جيهــان=حتى خلــود تقولهــا لــو تعرفـين
ما قلت لك سهلة على كل إنسان=تخرج من الأفــواه للـزين والشيـن
لكنه إحساسي ولـو كنت غلطـــان=منكِ لهـا بالنفـس نغمـة وتلحيـن
أحسهـا منـكِ تشــــابه للألحـــان=ما أقولهـــا تأكيــد لكـــن تخميـن
منكِ تدغـدغ للمشاعر والأشجــان=وأنـا بحــس الشعــر أقــول آميــن
يا علهـا من قلب صادق وولهـــان=ويكون هذا الحـس ما بين الاثنيــن
ذي كلمـة سمعتها بكل الأزمـــان=لكــن ما حسيتهــا غيـر ذا الحيـن
مدري لكن القلب من سمعهـا لان=صار الفكر يضرب شمال على يمين
ليا سمعهـا القلب يهتــز فرحـان=يرقـص طـرب وإلا ليا قالهـا يليــن
أكيد تخفي شيء للآن ما بــان=ولابــد مع الوقت خـافيـه بيـبيــن
وأما طلـع تخـميـن قلبي ببرهـان=وإلا بنــا شـكـه على الظن يازين
وأمـا فـرح وإلا بقـى مثـل ما كـان=واللــه على الأيـام والنـاس بيعيـن
الأمــر يحتــاج إلـه كفـة وميــزان=بقــرر الــوزنة بكــــل المــوازيـــن
وإلا بحـط القلـوب في جـوف قفصان=بجهــاز كشـف الكـذب بين المحبيــن
ثم نأخـذ التقـرير نعلنـه بإعــلان=ونكتــب عليـه الخــاتمة بالبراهيــن

لكم جميعا شكري وتقديري على مروركم


وردكم الطيب



لكم مودتي