بديت بسم الله وذكر وتسابيح=من بعدها جبت القلم للكتابه
برد للي صلح القاف تصليح=للشاعر اللي محتشم في جوابه
الشاعر اللي صحح القاف تصحيح=كسبان من باع له والا شرى به
نقح بيوت الشعر بالفكر تنقيح=والذئب يربا في وكور الذيابه
يا شاعر لوحت بالكف تلويح=صح اللسان اللي قصيدك حكا به
الطيب في كفته رجحت ترجيح=قاف يجمل من كتبه وقرأ به
قاف يداوي للكبود المجاريح=قاف مكمل ما لقيت الخنا به
سعد قصيده عد ما هو بتنشيح=من يارده من العطش إرتوى به
سعد بفكره يقدح العرف تقديح=عصابة لراسي يا نعم العصابه
يفدا سعد أهل الوجيه المكاليح=اللي بعضهم ضايقة به ثيابه
ويفدا سعد منهو ليا قام بيطيح=اللي يدس الراس وقت الحرابه
راع الصدق ما يملح الهرج تمليح=واللي يجيب الصدق ما شيء عابه
واللي تربا بشيح يقعد على شيح=كل على ما قيل باللي ربا به
وختامها عداد فرض وتراويح=صلوا على المختار وحضرة جنابه