سلام من شاعر تغنى بمحراف=والشعر مبنى واللبوس الطواريق
أقولها والقاف يا مبدع القاف=بعضه يعادل للسهوم الزواريق
بنقا جميله وأترك لحون تنعاف=اللي بعضها ييبس الحلق والريق
مثل الذهب مصروف من عند صراف=ماني من اللي يصرفون التفاريق
مصدارها عراف من بيت عراف=وميرادها للي يشيل البواريق
ما يطب للميدان رجال خواف=والشعر فن وذوق غير التلاحيق
بعضه ثقيل وبعضه حموله خفاف=وليا بغيت أثقله خائف تضيق
البحر في داخله محار وأصداف=سبحان من صور جميع المخاليق
إختار ما يعجبك من بين الأصناف=وأنا علي أجيب لك كل ما يليق
من الألف للياء للنون للكاف=اللي تبيه يجيك من دون تحقيق
ليا كان شاعر تحتمي كل ميقاف=هيا نتخاوى يا رفيق المطاليق
قود الوصوف يجيك من راسي أوصاف=على النقا ماني براعي تزاهيق
نذبح سمان ولا نبا هجف وعجاف=ترا الشحم ماهو بشربة ملاعيق
نبا نسوي بالشعر مثل صياف=أنته وأنا والله عليه التوافيق
وليا رقينا يا ولد فوق مشراف=غن القصيد وروق البال ترويق
وإحذر تعرض يدكم كل حذاف=ترى البشر فيهم خبول ومطافيق
يرمي بظهر الغيب لو كان ما شاف=يلفقون الكذب والزور تلفيق
نمام ذمام(ن)على الشين حلاف=غربان سود وصوتها من تناعيق
وبين البشر عقال تحكم بالإنصاف=يوثقون العلم والراي توثيق
أهل رزانة ما يحبون الإسراف=ما يتبعون القيل والخيق والبيق
قول وفعل لا صكت أكتاف بكتاف=مثل الصقور تصافق الصيد تصفيق
أهل عقول زحول بخيول ورهاف=تشرب رها من عد من قبل ما ذيق
هذا بعض ما قلت يا مبدع القاف=يا شاعر ودك بنظم الطواريق
طاروق شطرينه على الفاء والقاف=مضمونها للعرف مثل الصناديق