ياصاحبي لا تلحق اللوم بعتاب = انا زماني شق صدري بسيفه
كانك سواتي من عنا الوقت منصاب=لا تعاتب المجروح وانته رديفه
انته وانا في عصرنا مثل الاغراب = نمشي مع الشارع ونكره رصيفه
نفرح ونستبشر مع الوقت لا طاب = وانضيق لاصارت همومه كليفه
تسوقنا القسمه مع دروب الاسباب = على جحافيل الظلام المخيفه
اثر الامل كذاب والوقت كذاب = والناس كذابين منهم نصيفه
كم اخدعتنا ضحكة السن والناب = ولا غرنا غير النوايا العفيفه
بمعادي(ن) متلبس(ن) ثوب الاحباب= نذل (ن) يغش اهل القلوب النظيفه
الغش شايع وانتشر بين الاصحاب = حتى الحليف اليوم باق بحليفه
يوم الوفاء نفدا بعضنا بالارقاب = والقصد سامي والنوايا شريفه
واليوم نصاب(ن) يجامل لنصاب = مخادع(ن) غر الخلايق بزيفه
تسودنا في هالزمن سنة الغاب = المجتمع ياكل قويه ضعيفه
كانك فقير يصك في وجهك الباب = وكانك غني تقلط على اعز ضيفه
وقت الغناء الفاحش طغى وفوق الانساب= واطفاء وهيج اهل السيوف الرهيفه
يرفع مقام اشناب ويطمن اشناب = وينزل الخادم محل الخليفه
يعني يذل الروس ويعز الاذناب = واضفاء براده فوق لا هوب صيفه
حتى الصقر نزل على وكره غراب = بالساميات الطايلات المنيفه