أسعدكم الله دنيا وأخرة
للتواصل بلا فاصل
اليكم الأبيات بدون مقدمات
ليت الأماني مثل ما تريد وأريد=تحققت ياليت مابه عوايق
ولو العوايق بيننا شاسع البيد=جئتك وقدمت لك كل الحقايق
ماكان والله عنك ياهيه بحيد=وإلا أضيق وخاطرك بعد ضايق
ياما تمنيتك بليا مواعيد=ماغير أنا وإياك والشوق شايق
شوفتك عندي عيد ما غيرها عيد=وأنا لوصلك طول الأيام تايق
لكن ظروف الوقت ياشمعة الغيد=غصبٍ(ن)علينا باعدت للطرايق
ودك وأنا ودي نكيد التناهيد=اللي مع الأنفاس مثل الحرايق
أحس في صدري طعون ولواهيد=لا من ذكرت إنك من الشوق ذايق
أون ونة تكفي الخلق وتزيد=لا تحسبني بعد فرقاك رايق
حبك بقلبي يزيد لو إنك بعيد=لو هو معذبني على الروح لايق
لا زارني طيفك جمعت الشواريد=في هاجسي لو كان ماهو بفايق
وغنيت له طاروق عذب التناشيد=جميل خالي من جميع الزهايق
مشاعري تسقيه عذب المواريد=في داخلي من جمرة الفكر سايق
حبك ببيت الروح ما يعيز تجديد=ماكن تمكن من جميع العلايق
ياما شرحته لك حشمة وتمجيد=يافاتني من بد كل الخلايق
مافيه داعي أشتكي منه وأعيد=وإلا أبرهن لك عليه بوثايق
ليت الأماني مثل ما تريد وأريد=تحققت ياليت مابه عوايق