أسعدكم الله
وقفات بين الأمل والعمل
بين الحلم والواقع
بين الضعف والقوة
النتيجة واحدة
اليكم الأبيات
اليوم هذا غير ماهو مثل أمس=والله يعلم ويش بيصير بعدين
تبخرت أحلام ليلي من الشمس=اللي حرارتها تقارب لخمسين
الأدمي مغموس في دنيته غمس=دنيا تقلبنا على الشين والزين
نحلم ونرسم بالظواهر وبالدس=والله يعلم زين الأعمال والشين
شيء صحيح وشيء حسٍ(ن)بلاحس=وأشياء كثيرة ماتقاس بموازين
أحد يتعلم وأحد ما يفهم الدرس=والفرق واضح بالنتيجة للأثنين
بين الرجا واليأس والزين والنحس=نركض مع الأيام ركض المجانين
ما كننا جينا عرايا بلا لبس=ونخرج عرايا بالخطايا مدانين
أحدٍ(ن)تعبه من الفقر ما معه فلس=وأحدٍ(ن)تعبه بكيف يجمع ملايين
نزرع ونحصد مازرعنا من الغرس=يانفس ماهو تزرعينه بتلقين
كلٍ(ن)عليه إثمه وما تجني النفس=من خير وإلا شر والعز بالدين
مافيه حي إلا شعر يوم بالتعس=كل البشر لأدم عبيد وسلاطين
الله خلق للموت يفرس بنا فرس=مهما بلغنا من تجبر مساكين
كل الغصون تموت وتعود لليبس=وأخر مردٍ(ن)للمخاليق بالطين
والأخرة ميعاد للجن والإنس=أما بجنة خُلد وإلا مهانين