أسعد الله أوقاتكم بكل خير
اليكم تخاريف هذا المساء علها تروق لكم
وش مانعك يا مشغلٍ(ن)قلب مغليك=ارسل على الموجوع منك علاجه
هذا جزاه إنه يحبك وراجيك=تكسر فؤاده مثل كسر الزجاجه
تقطع حبال الوصل ربي يجازيك=بعد وهبك القلب والشوق هاجه
والله خسارة بيعتك قلب شاريك=وشلون تحرم للمحب إبتهاجه
لو كان ماسويت به صايرٍ(ن)فيك=أدري بتحسبها جنون وسماجه
وإن كان هذا الفعل ماهو بمرضيك=وشلون ما تقضي لمغليك حاجه
أقل ما يمكن تراسل مهاويك=حتى يجي من بعد ضيق إنفراجه
ترى الوصل يامهدي الجرح يعليك=في عين من يهوى ويفرد حجاجه
والهجر والنسيان والصد ينهيك=في قلب من يعشق يعكر مزاجه
كانك قطعت اللي من الناس باغيك=صافي هواكم يتنتهي في عجاجه
لا تخدعك دنياك وإلا تلهيك=والحب يطفى من دروبك سراجه
من بعدها ما تنال هذي ولا ذيك=لا صار بدروب التصافي عواجه
تارد ويارد من يودك مهاليك=ويصير بظروف الغرام إرتجاجه
مهما يقول إنه محرم تناسيك=كل حي مهما صار يتبع خراجه
وإن كان ما سارعت لدوا مداويك=يصعب دوا قلبه ليا اليأس لاجه
لا تنشغل يامشغلٍ(ن)قلب مغليك=ارسل على الموجوع منك علاجه