أسعد الله أوقاتكم بكل خير
الحياة لا تبقى على حال ومثل ما قيل دوام الحال من المحال
ولكن مما يحز بالنفس حينما ترى الأمور تتغير الى الأسوء
بهذه الأبيات لامست قليلا مما رأيته قد تغير بحياتنا
بين ماضي ليس ببعيد وحاضر ينبيء بقادم غير محمود
فالشواهد لا تبشر بخير وعلى قولهم: من جرف في حديرة ياقلب لا تحزن
المهم اليكم جانبا من تخاريفي
الا ليت وقتٍ(ن)فات يرجع مثل ما كان=يعود زمانك يا نخيل الثوابيًه
تعود سنين الرجع للسيل والغدران=تردها ورود البدو صبحٍ(ن)وعصريًه
زمانٍ(ن)شقا لكن فيه العرب ظفران=يقومون بالواجب ولو هم شقاويًه
زمانٍ(ن)لحقته ما لحقتوه ياعثمان=زمان القلوب صحاح ما تقلب النيًه
زمان الفتى يفخر به الخال والعمان=كريمٍ(ن)شجيع الى دعا داعي الهيًه
زمان الرجال رجال والنعم للشجعان=وذا الحين صار النعم يعطى لجاويًه
زمان الرجوله تنعرف فيه بالورعان=وذا الحين موتى قلوب وأجسادهم حيًه
يصير الولد شايب وهو يقطع المرحان=على قولت الأمثال ما يقهر رعيًه
شبابٍ(ن)ثلاث أرباعهم طارحه إدمان=وباق الشباب ملازمٍ(ن)داجي الفيًه
يبا كل شيءٍ(ن)جاهزٍ(ن)والهدوم الوان=على الواتس طول الوقت من سيه بسيًه
ليا راح في لازم تقل عاجزٍ(ن)كسلان=يجر القدم ويروغ لو شاف له فيًه
كسولٍ(ن)خجولٍ(ن)فيه تشبيه بالنسوان=ويجتر مثل جرة من الذود قوميًه
يمسح لغرة حدها حجة الأعيان=ليا من نخيته قال:تعبان مافيه
صحيح الزمن تعبان والجيل ذا تعبان=خسارة خسارة راح وقت الشهاميًه
أنا من زماني يا هل المفكرة وجعان=لكن العلاج اليوم ما صار بيديًه
أشوف العلوم مروحة ساقة الشيخان=تولى زمام الأمر في وقتنا عيًه
الا ليت وقتٍ(ن)فات يرجع مثل ما كان=يعود زمانك يا نخيل الثوابيًه