أسعدكم الله
من ذاكرة الزمن لذاكرة الشعر
او من ذاكرة الشعر لذاكرة الزمن ايهما شئتم
الأبيات
العروس الجميلة زينت للبوس=بدر شارق لكنه ما طلع في سماي
ليلة العرس كن القصر فيه الشموس=قاهرة للبني تقول:منهي حلاي
حظ منهي غدت له ما تهم الفلوس=ليتها من نصيبي كان ألا يا هناي
باركوا للعريس وباركوا للعروس=غير أنا يا كريم الوجه تحسن عزاي
الف مبروك وأنا بالحسوف مغموس=الأمل ما تحقق لي بغاية مناي
هب يا حلم وردي بالفؤاد محسوس=أشربه من عطش روحي وزود ظماي
بعد راحت لغيري كن بالقلب موس=تقطع عروق قلبي وين بلقا دواي
النصيب انقطع غديت بن محموس=ما يبل العروق من القهر شرب ماي
أصعب من الكسور بعظم كسر النفوس=حسبي الله على حظٍ(ن)يدور بلاي
كن بالقلب سيف ليا النصاب مغروس=من فراق الوليف اللي عطيته هواي
ما بقا غير همٍ(ن)بالضلوع محبوس=وقتي أمحق وقف ضدي ولا هو معاي
ما يكيد البنادم غير حظ معكوس=مثل ماهو حصل لي كن نار بحشاي
أتوجد وأخاف من النذول النجوس=يشمتون لمصابي كان سمعوا عواي
والله لياخذوني مثل علك الضروس=ما يلاقون واحد يشمتوا به كماي
مير هذي وتوبة ذقت منها دروس=يالله إني طلبتك لا تزود شقاي
الطف بقلبي اللي كن يرعاه سوس=انقطع بعد راحت من لقاها رجاي
شيمتي ما تهين النفس وتذل روس=والله إني ما أهين النفس وأرخص غلاي
ماني اللي ليا ظامه زمانه يحوس=الصبر والعزيمة طب جرحي وداي
المقادير تجري بالزمان العبوس=والكرامة أمامي ما تعود وراي
العروس الجميلة زينت للبوس=بدر شارق لكنه ما طلع في سماي