غـابت اللي قاهره كل الصبايا=
من بعدها صارت أيامـي رتيبـه=
المشاعر تلتهب خلف الحنايا=
ما مضى لي مثل غيبتها مصيبه=
ما هناني لا صباح ولا مسايا=
كل ما نحيت ريبه جات ريبه=
خائفٍ(ن)تسبق على النفس المنايا=
قبل ترجع من بعد طول المغيبه=
آه يا حظٍ(ن)سقا قلبي رزايا=
والفؤاد أسقاه للنفس الكئيبه=
ما جنيت من الغرام إلا شقايا=
الضحوك بعيد والونة قريبه=
لا ذكرت إن الغلا نادر حلايا=
بالحسن والذوق والعفة رهيبه=
نادرة بين النساء حلوة مزايا=
مستحيل أنثى تشابه للحبيبه=
شامخة مثل العلم قبل السرايا=
المشاعر خلفها صفة كتيبه=
يا عسى بيض العرب فيها فدايا=
وإن فداها الناس جمعا مو غريبه=
تستحق أرواح تأخذها هدايا=
وتستحق أرواح تأخذها غصيبه=
مو خسارة بالغلا جزل العطايا=
كل ما بعطى لها ماهو غليبه=
عاشق ومجنون فيها يا هنايا=
هي دوا عشقي ولجنوني طبيبه=
لو تغيب سنين ما بحت الخفايا=
العزيمة كنز والقوة مهيبه=
المغيبة ما تغير للنوايا=
حبها بالقلب عصفاته عجيبه=
ما منعني لا بعاد ولا زرايا=
دامني طلاب والتحفة طليبه=
ما يهم الوقت لو سوى سوايا=
بالخفوق من الظروف اللي عصيبه=
وعزة الله ما كماك ولا كمايا=
بنت شيخ مجننه شيخ بعتيبه=
لأجل عينك تتعب أقدام ومطايا=
ولأجل عيني تأقف شيوخ وشبيبه=
عودي ياقاهره كل الصبايا=
دنيتي يا منيتي بعدك رتيبه=