طابت أوقاتكم
ما عاد بنشد عن مخاليق مقفين=تبع المقفي يتعب القلب والروح
تبعتهم بالعمر مقدار عامين=لكنهم باعوا ولا شفت مصـلوح
ومن باعني بعته على وقته بدين=وإن عاد لي قلت الصفا قبل ما تروح
ما عاد لك بالقلب حشمة ولا لين=ذاك الغياب الأولي عقب جروح
محال تبرا لو قلت: لك واهلين=قلبي من الهجران لا زال مسدوح
يرقص بصدري والقصايد براهين=سواة رقص الطير بالسهم مذبوح
خلف الضلوع العوج دم الشرايين=في كل عرق من الطواعين مسفوح
وشلون عاد يعيش عقب الطواعين=والدم بعروقه من الضيق بيفوح
إن جاء يسامح خايف إنك تعودين=على الغياب اللي مسبب له قروح
وإن جاء يكن الجرح من شأن ترضين=أربع دقائق ثم يرجع على النوح
حيثك كذا طبعك من شهور وسنين=تعاملك وإياه سلوات ومزوح
لكن عليك الله يا كامل الزين=دامك نويت الهجر لا تمنع البوح
بلغني بحالك من الحين للحين=بعض الرسائل منك تمنحني فروح
حتى لو إنك ما تبي شوفة العين=يكفي سلام وكيف حالك ومسموح
هذا قدر مكتوب بالوصل والبين=مقسومنا مكتوب من قبل باللوح
الخاتمة ماني من اللي مقفين=إن جيتني جيتك تفرح بها الروح