ليت الحقيقة ياخيال المراسيل=تصدق بليا قيد فيها وشرطي
لكن حسافة عدلها يعشق الميل=ماحنت لقافي ولاحرف خطي
ياداعج اللي من هدبها مظاليل=المعذرة لن كنت بالحلم مخطي
لو صار ما ترجيه ماقلت يا ويل=لكن حظي في منامه يغطي
مغير أسلي خاطري بالمواويل=عنيت روحي بين شيلي وحطي
أساهر الأحلام وأحط وأشيل=خط الهنا واضح معاكس لخطي
أحصد من الأوهام هم وغرابيل=سود الليالي راس شامخ توطي
هذا انا أفنيت للعمر بالقيل=واللي أريده ما تحقق وشطي
أبعد من القطب الشمالي عن سهيل=حظي منه أطياف يمي تنطي
تسهر معي والليل فيه التعاليل=تأخذ من الأحلام ما عاد تعطي
طيف ٍ يسامرني من سنين مازيل=كنه أمام العين مربوط ربطي
صارت عيوني كنها من درابيل=اللي تراقب شخص بيدين شرطي
هذي حقيقة ياخيال المراسيل=تصدق بليا قيد فيها وشرطي