يعربية حسنها ما هو بعادي=كنها بدر الدجى ليلة تمامه
استحلت للمشاعر والفؤادي=فازت بكلي على حب وكرامه
ما نفعني حرص عقلي وإجتهادي=طحت طيحة حر في شبكة حمامه
من يصيد الصيد لا بده يصادي=ما يمر العمر كله في سلامه
مثل ماني طحت في عين السهادي=من بعد ما صادني راع اللثامه
صارت عيوني خصيمة للرقادي=ما تبي للنوم والقلب بهيامه
من مغيب الشمس لا بعد الهجادي=اتقلب مثل مذهول القيامه
ودي أطوي للمسافة والبعادي=لين أريح خاطري وأروي غرامه
مير أخاف من الملامة والنقادي=من ضعاف عقول ورباية رخامه
ما دروا إن الهوى سم المهادي=ما منعه من الهوى سيف وقرامه
الهوى ما يلزم إلا بالثنادي=من وقع به كن مكسوره عظامه
ما ينام الليل في هم وجهادي=السهر طابع تحت عينه علامه
لو ينادى ما سمع صوت المنادي=شارد ٍ(ن)ذهنه ولا فيها ملامه
دام قلبه مولع بترف الأيادي=ما عليه من العذول ولا كلامه
الهوى والشوق ما يعرف حيادي=استحلت للخفوق وللشهامه
يعربية حسنها ما هو بعادي=كنها بدر الدجى ليلة تمامه