البارحة حلمت حلم الطفولة=حلمت وليني صغيّر على المهد
حلمت لي بشيء(ن) لكني مطوله=أحلم كأني أرضع المر من نهد
شكله غريب وفيه طعم العسولة=ماني بعارف كيف مر(ن)على شهد
وبلحظة بلغت سن الرجولة=كني على خيله بلا سرج وأطرد
وأحلم كأنك فائزه بالبطوله=كني كتبت اسمك على صفحة الخد
كني ملكت الكون عرضه بطوله=نصبتكِ(ي) وريثة الملك والعهد
صحيت من حلمي ولا محد حوله=الا الحسائف والتناهيد والوجد
ما نلت من حلمي ولا قد فولة=مدري ضغوث أحلام من شدة البرد
قلت أسأل العراف باللي أقوله=لعلي القي عندهم شي من رد
لقيت الأريا من حلومي خجولة=والبعض ليا مني ترجيتهم صد
لقيت فيهم من زوايد فضوله=يقول لي يمكن معك جني أمرد
هذي جنون أفكار كيف معقولة=ليا جيت ترقد أذكر الله تشهد
قلت إبعدو عني يقوم مخبولة=تفسيركم للحلم في ظني أبعد
لا تتعبون أرواحكم يا عذولة=ماني بسامع رايكم هات ثم ود
حلمي فرس عند الملاقا جفولة=أنا وهيه كننا الجزر والمد
حرة من الحرات بنت الحمولة=غدا لها قلبي محطه ومرصد
ملك فؤادي وأخذ بالفكر جولة=والحلم يسري يمها ثم ينرد
لاهي بترضيني ولاهي زعولة=مر(ن) تلين ومر فوقي تمرد
والروح تعشقها لكن مغيولة=من صدها اللي كل يوم يتجدد
هذي تفاسير الحلوم المهولة=اللي تجيني كل ما جيت مرقد