فات الزمان اللي من أول تمنا=تعيش لي سيد وحارس وخادم
يوم كنت مثل الخيزرانه تثنا=وأنا بكفك مثل ما قيل خاتم
ذا الحين جاي تقول:حالي معنا=وش غير الأحوال لتكون نادم
وش غير أحوالك عسى الله يمنا=بعد الغزل والحب صرنا نتخاصم
ما عاد أشوفك لاجل عيني تحنا=وإن جيت من غيبة تكاثرت سالم
أحرمتني عطر(ن)منول يبنا=حلت بداله رايحات المراهم
وأنا تراني فيك ما بتشنا=لجل الغلا دافن بقلبي وكاتم
أدور مثل السانيه ما تونا=أبيك ترضى لو ما كنت فاهم
لكن أشوفك صرت مشغول عنا=والله باللي داخل القلب عالم
مدري جفا والا تمللت منا=ولى الربيع ومقبلات السمايم
اليا تساوى فرحنا مع زعلنا=ماني بداري كيف بعد نتراحم
بعد جميل أيامنا قد دفنا=الله يعلم ويش بالوقت قادم
من يوم صرت أنا غريب بوطنا=ماني براجي من بعدها غنايم
ما عاد تفرق لو بعدها رحلنا=أموت مظلوم(ن)ولا أعيش ظالم
المختصر عساك دائم تهنا=وأنا بعيش اللي بقا عنك صايم
بس إفتكر أيامنا كيف كنا=يوم كنت أنا وإيك مثل التوايم
طوتكم الأيام مدري طونا=قالوه بالأمثال ما شيء دايم