مرت تشيل بيدها شنطه=جذابة االألوان وردية
فوقه عباية حيل منضغطه=مفاتنه مهي بمخفيه
الشعر مزوي فوق بالربطه=كنه سنام(ن)فوق جهميه
بخورها والعطر مختلطه=منته بعارف ذي من ذيه
الزين فيها ما بها غلطه=واضح علاها ميه الميه
شبه الغزال بمشية البطه=لكن ما بالقلب ماويه
سهم التجافي يمنا قطه=ما يدري إني في حنيه
من شفتها والروح منحطة=كني تغير كل ما فيه
أخاف قلبي صار به جلطه=من رعشة(ن)بانت على يديه
لو قابلت طابور من شرطه=صفوا سوا وأعطوا لها تحيه
تكفا يا زين الحسن ذا غطه=لا تتبع السيات للسيه
قدام تاقع يوم في ورطه=من عين واحد فيه جنيه
خاف الكريم اللي لكم حطه=لا تقول:حسني صنعة يديه
وط التعالي والكبر وطه=دامك شباب وروحك(ي)حيه
أذكر حياتك بعدها شرطه=جنة ونار وما لكم ليه
ترى العمر سبحه ومنفرطه=أيام ذي راحت وذي جيه
محطوط تحت أعمارنا شخطه=مهي من الخلاق منسيه