عساكم بالف خير
هذه القصيدة رقم 100 بالديوان الثالث
وبعون الله سوف نبدأ بالديوان 4
دعواتكم
أنا حرفي قصيد وحرفكِ تاريخه ومعناه=ليا منه تعانق حرفي وحرفك تعانقنا
بصمت الليل يغزيني غرام(ن)ماعرفت دواه=وهذي حالتي من يوم حنا تفرقنا
يسامرني غرام وشوق ماني عارف أتلاه=ولا ياخوف نفسي للعمر والوقت يسرقنا
الا يا فاتني لو قلت لك مليون آه(ن)آه=تنفس كربة تجتاحني لحظة وتشوقنا
لكن الشوق والأحلام تبفى بالخفوق ملاه=تصابحنا وتماسينا وتحيينا وتحرقنا
رماني حظي المنحوس في درب الهوى ويلاه=شغل روحي شغل فكري ولا أدري وش يروقنا
براني بري طفل حط له مرسام في مبراه=وقام يحركه بيديه والمبرا يمزقنا
سلب مني كثير ولا عطاني شيء وا عزاه=تسابقنا وأحسب إني سبوق وصار سابقنا
يشاغلني ويشغلني وقلبي ما ينول مناه=نصد ونحسبه ما يرد لكنه يلاحقنا
ركبت بزورقه لكن ماني عارف بمرساه=على موج عنيف وظن بالي سوف يغرقنا
لكن اللي كتبه الله علينا بالعمر نلقاه=قدرنا والقدر مكتوب لابده يطوقنا