راعي الصدق ان حضر قسمه خيار القسوم=وانت هـات العلـم ياراعـي المصداقيـه
البقا يااللي ترحب علـى حسـب السلـوم=في محل (ن) يرضـي الكـل والاذواقيـه

خل عينك في سماء نجد وتعد النجوم=لاجل مادون السماء ياسعد مدراقيـة
اللسان يصوم ولقلب عيا لا يصـوم=ارحمو قلب(ن) على قربكم مشتاقية

مستشار القوم شفنا على شمسه غيوم=احد نايـم واحـد يـم العـلا سباقيـه
من مشى بالقلب الابيض يحصل مايروم=مير اظن الصقـر ملـزوم بالمسباقيـه

نبذل المجهود والحظ بأمر الله يقوم=والظوامي فوق جم الروى متلاقيـه
مايضيع بهالزمن غير من قلبه رحوم=الحياة اجهـاد والصبـر ماينطاقيـه

الشلاوى روحـت بالطماعـه يالبقـوم=والذبيحـه علقوهـا علـى المعلاقيـه
ماجدى بعض العرب غير عضات البهوم=مشكله والمشكلـه مـن ذوي زراقيـه

بعد ما شفنا الطمع في رديين العزوم=جيرة الفيصل ولا جيـرة البواقيـة
اطلب الله ياسعد والعوافـي ماتـدوم=واحسب المخراج لا تحسب الممراقية

البلا من طيرك اللي مع الغبشـه يحـوم=جاب داب اسود ومن سكرتـه مافاقيـه
حاسب حسابي واعرف الدفاع من الهجوم=ميـر ضـم العلـم ياطـاق ياطرباقيـه

يالبناخي لوحسبنـا حساب(ن)للرخـوم=ماجلبنـا بكـرة الـقـوم للاسواقـيـة
البحر قدمك وطب البحر واغطس وعوم=والسلامـة طيبـة والحيـاء براقـيـه