أسعدكم الله
اهديكم هذا المساء هذه الأبيات المتواضعة
علها تروق لكم وإلا أنا ماني برايق
هجرت نومي لأجل اساهر طيوفك=ياللي غرامك نار تحرمني النوم
بعد زماني حال من دون شوفك=بموت وأنا منك يا خل محروم
بُعد المسافة ساعدتها ظروفك=مشاغلك كل يوم بتزيد عن يوم
لا قادر اجي لك ولاني بعوفك=باقي حياتي كلها ضيق وهموم
دام الليالي زودت فيك خوفك=قصر الأمل في داخلي صار مهدوم
ما صرت مثل أول تجيني حروفك=صار الحكي ما بيننا شبه معدوم
صدك وهجرك والتجاهل سيوفك=تطعن بها في قلب مغليك وتلوم
أشياء كثيرة بالليالي تطوفك=وليا سألتك جاني الرد محكوم
كثرت معاذيرك وكثرت حلوفك=تظلم هواك وتدعي منه مظلوم
ما تدري إني مشغلتني وصوفك=أشوفها بأطياف وتجيني حلوم
عدة سنين القلب لعبة كفوفك=والشوق والحرمان في قلبي سهوم
لو كان حبٍ(ن)حاف قلبي يحوفك=في ذمتي لتصير بالمثل مسموم
تهجر لنومك من مواجع حسوفك=تسهر كما ما أسهر مولع ومغروم
لا من عرفت أوجاع مثلي تلوفك=ناديتني لا تبتعد سيد القوم
عجل مجيك لا تدير لكتوفك=قدام تسمع بالخبر مات مرحوم
تعال كمل بالليال معروفك=دام الهوى ما بيننا حظ مقسوم
بهجر لنومي لأجل اساهر طيوفك=ياللي غرامك نار تحرمني النوم