بسم الله ابدأ لقافي واتكالي فوق رب ٍ رحوم=
الواحد اللي بعلمه يعلم الأرواح وأجالها=
والثانية ياصلاتي فوق من هو عن خطاه معصوم=
الهادي اللي عصمه الله عن الزلات وأعمالها=
والثالثة يا سلام الله على أهل الطيبة والسلوم=
في حلة ٍ طيبها من طيب راعيها ومن جا لها=
جينا لكم في لزوم الصحبة اللي ما بعدها لزوم=
والشكر لله وللي زهب الدلة وفنجالها=
رفيق جنبي زميلي راعي الطالة بكل العلوم=
والناس ما تعرف إلا بالشيوخ وفزعة رجالها=
أبو رعد ياعسى يفدونه الشجعان قرم القروم=
ما كنه إلا سراة ٍ بالحجاز وشامخ جبالها=
ما منسبه من رخوم ولا فعوله من فعول الرخوم=
الأوله لن طابها في زمانه طالها طالها=
يرسي لها مثل حضن اللي تفاخر به رجال البقوم=
الكايدة ما تعيزه كن حضن الضلع مشتالها=
بعد أربعين وثلاث من السنين اللي تهد العزوم=
ما قال بروح في حالي وخل الناس بأحوالها=
جمعتنا يا علي بعد المغيبة جعل خيرك يدوم=
يا راعي الأولة والأولة من فعل خيالها=
كسبت للسابقة ما تنلحق ما بين ليلة ويوم=
جمعت هذا الوجيه اللي يفوح الطيب بسبالها=
الصحبة الطيبة ما تنسي مهما تكون الهموم=
بالذاكرة ما تغير دام بيت الروح منزالها=
العزم والحزم ميزة للرجال محيدين الخصوم=
والطيب والطيبة من حظ راعيها ومن قالها=
قسمك من الطيبة يابو رعد من عاليات القسوم=
والباقية للرجال الثانية تقبل وتكتالها=
كل ٍ على قد حاله والغنائم مثل رمي السهوم=
أحد ٍ تصيبه وأحد يخطيه بالرميات نبالها=