بيض الله وجهيكم
جاء ما كفا وإن عدتم عدنا
الكرد ياراع الصدق تبا إنفصال=والجو عيا يا ولد يصفا لها
والناس لا من صابهم زيف وخمال=يتعب مداويهم يعرف خمالها
اكبودهم لن صابها غش ونغال=يا قدرة الله من يطيق نغالها
ياللي تحسب الخيل جنس من البغال=اهل بخارى عارفها ببغالها
السيف بين بالمقاضب والنصال=جود مقاضبها وخل نصالها
سبعين عام القدس واقع بإحتلال=وأنته وغيرك لاهية بأعمالها
ياللي تليم بالحصا جوف الشوال=والناس تجمع بالذهب بشوالها
حاولت اسنعكم وأعدلكم عدال=لكن بلشت بعوجكم وعدالها
قالوه قبلي غطها تحت الجلال=وإن كان ما سدت يجيك بدالها
بكويك كية جنب طبٍ(ن)للسعال=أخر دوا لصدوركم وسعالها
رجلٍ(ن)تدوس الشوك مافيها نعال=يا صاحبي من حفيها يرثى لها
ياصاحبي لن كان ما فيك إحتمال=اربط جنون الشعر في سلسالها