الأبيات بدون مقدمات
إهداء خاص
لأعضاء القوافل
هاتي يمينك تحتضنها يميني=خليني أقهر كل عاذل وشمات
يفداك والله مابقى من سنيني=والا الزمان الزين من عمرنا فات
بعلمك عن كل ماهو بفيني=وبسمعك بالبوح والهمس وسكات
وإن تهت في دنيا الغرام أحضنيني=خليني أنسى مامضى لو لحظات
عندك ومعك أنسى عجاف وسميني=أتيه في دنياك نظرة وبسمات
لاصرت بين يديك وأنتي بيديني=الوقت يمضي معك سواة لمحات
ودي عقارب ساعتي تحتريني=والليل يمسي عام ماهو بساعات
من خوف لا أقبل صبحنا تتركيني=وأعود مثل أول بحسرة ولوعات
أخاف لاتنسين ما تذكريني=والا الزمن يشغلك بجيه وروحات
عز الله إنك وقتها بتقتليني=وأموت ياكل الغلا مثل من مات
لو صار هذا بالحيا إدفنيني=إقري علي ياسين ثم التحيات
وش عاد يبقى بعدها يا ضنيني=الا جروح وساع وهموم وآهات
إن ضعت منك الأن لا تدوريني=ترى الزمان اليوم كله متاهات
ما عاد أنا راجع ولا ترتجيني=إليا تفرق شملنا نغدي أشتات
ليا حالت الأيام بينك وبيني=إدعي لنا بالخير عقب الصلوات