أسعدكم الله
كم حاولت أن أكتب ما يرضي الجميع
ولكن رضا الناس غاية لا تدرك
وعلى ما قيل : مالا يدرك كله لا يترك كله
اليكم الأبيات....هذه القصيدة رقم 100 في الديوان 12 خاتمة الديوان
يا قصيدي بعد غاب اللي يسلي خاطري=ما بقا لي شف في نظم القوافي يا قصيد
القصائد ما تزين إلا بجوٍ(ن)شاعري=الأماني ما تداوي والحسايف ما تفيد
غيبة الغالي ثمنها جرح في مشاعري=المواجع كل يومٍ(ن)للحشا تهدي جديد
ما يطيب الجرح وأنا ما يشوفه ناظري=كل يوم يمر حبه في معاليقي يزيد
كيف يبرا جرح قلبي لو قلبي صابري=مستحيل يطيب جرحي دام مضنوني بعيد
طيف خلي ساكنٍ(ن)تحت هدب محاجري=يشعل الأشواق في قلبي لمضنونٍ(ن)فريد
أتمنى شوفته وأسمعه فوقي يأمري=مير رب العرش يفعل في عباده ما يريد
وأتمنى لو لليلة بالزمان يسامري=قبل ياقف دم قلبٍ(ن)عاشقه جوف الوريد
وإن تمادى في غبابه يالحون السامري=إرحلي بنك القصائد مفلسٍ(ن)مابه رصيد
الحياة بدون مضنوني خناجر غادري=من كفوف الحظ لا عاند وأنا حظي عنيد
ما نفعني رزن عقل ولا جنون مغامري=أتظاهر بالرشادة والبلا ماني رشيد
الزمان يمر وحصان السعادة عاثري=ما يفيد العمر لا من ضاع لو إنه مديد
كل يوم أشوف حظي مثل عمري حادري=والمصيبة موت عاشق ما يسمونه شهيد
كلنا زاد المنايا حكم ربٍ(ن)قادري=والمقابر ما تعاف اللي شقي واللي سعيد
يا قصيدي بعد غاب اللي يسلي خاطري=ما بقا لي شف في نظم القوافي يا قصيد